Z Bórkow/Burg. Kwiśeca łuka na bórkojskej dwórnišćowej droze, źož mjatele wokoło lětaju a pcołki byrce, jo magnet za wócy wordował. Tuske towaristwo pcołkarjow jo ju zapołožyło. Wóno chyla něnto teke z wjelikeju toflu zajm na ten projekt a na wažnosć šćita wjelerakosći družynow. Spócetnu ideju, kwiśecu łuku w Bórkowach zapołožyś, jo měła jadna wobydlaŕka, ak jo se z tym na šołtu Hansa-Jürgena Dregera wobrośiła. Ten rozpalony pcołkaŕ jo jeje ideju pśewšo rad załapił. Tak jo cłonki bórkojskego towaristwa pcołkarjow wó tom pśeznanił, na płoni něgajšneje tekstilneje kupnice łuku zapołožyś. Bórkojske gmejnske zastupnistwo jo pśigłosowało, to zelenišćo za take wužywanje k dispoziciji stajiś.

„Mjod źe móžoš ze cełego swěta importěrowaś. Ale nic wugbaśe woprošenja, kenž jo notne za domorodne rostliny, aby wóni płody měli, a aby pcołki a druge insekty mógli pśežywiś“, rozkłaźo pśedsedaŕ bórkojskego towaristwa pcołkarjow Heinz Tscheslog. „Pśežywiś mógu pak jano, gaž jo teke wjelerakosć rostlinow a kwiśonkow dana.“