Pśi Smolerjojc knigłaŕni w Budyšynje wón na mnjo caka, 34lětny historikaŕ a wjednik wótźělenja kulturneje wědomnosći w Budyšyńskem Serbskem instituśe dr. Fried-rich Pollack. Serbsku rěc wón, kaž zgóniju, w swójskej iniciatiwje wuknjo a kuždu góźbu wužywa, se we tej rěcy dalej wudopołniś. Młody muski jo se do pśeslěźenja serbskeje historije a serbskego žywjenja w zjawnej towarišnosći zanurił a statkujo na tom pólu wědomnostnje južo wjelgin wuspěšnje. „Na pólu historije, ale tež za pśibytnosć pokažo se telik potenciala a bogatosći, až mě ten wobłuk pśecej zasej zagórijo“, wědomnostnik wuswětlijo.

Roźony Kamjeńcanaŕ jo w swójźbje ze šesćimi źiśimi wótrosł. Starjejšej stej mjaztym wuměńkarja. Maś jo była kuchaŕka a nan jo měł twaŕski wobchod. Wó serbskosći njejo doma a w rodnym měsće pśisamem nic słyšał. „Akle na Kamjeńskem Lessingowem gymnaziju, źož som wót 1996 do 2004 chójźił, som něco wót Serbow zgónił, we fachu historija“, wón groni.