Z Města/Cottbus. Wokrejs Sprjewja-Nysa jo kurs za serbšćinu za wótkubłaŕki a hortnaŕki nowo do žywjenja wołał a to pó něźi źaseś lětach zasej. To jo absolutnje notne było, pśeto serbski powědajucy personal njefelujo jano we wokrejsu SPN, ale wšuźi w sedleńskem rumje Dolnoserbow. Notnje jo to teke togodla, dokulaž we toś tom wokrejsu bydli nejwětšy źěl serbskich wobydlarjow Dolneje Łužyce. Togodla wjele starjejšych se žycy, až jich źiśi južo w młodšem starstwje, pótakem w źiśowni, ze serbskeju rěcu do kontakta pśidu. To samske płaśi za horty w zakładnych šulach z fakultatiwneju rěcneju wucbu abo z Witaj-serbšćinu.