Z Města/Cottbus. Krotko do kóńca wustajeńce „WOBRAZE KRAJINY. PODOBE POKRAJINE. BILDER EINER LANDSCHAFT. WOBRAZY KRAJINY: Pśechod. Übergang. Prehod. Přechod 03“ su zachadny pětk zarědowali serbsko-nimsko-słowjeńske cytanje w Galeriji Bramborska. Spisowaśelki Anja Golobowa ze Słowjeńskeje, Cvetka Lipušojc z Korutańskeje (wóna jo Korutańska Słowjeńcka), Lubina Hajduk-Veljkovićowa z Górneje Łužyce a Jill-Francis „Źilka“ Ketlicojc z Dolneje Łužyce su pśedstajili swójske teksty w słowjeńskej abo w dolno- respektiwnje w górnoserbskej a w nimskej rěcy. Dolnoserbska awtorka Źilka pśi tom wšak njejo zastupjona w katalogu k tomu tśikrajowemu projektoju. Wóna jo se 2020 do togo zapśěgnuła, tak jo zachadne lěto teke w Korutańskej dolnoserbske literarne teksty cytała.

Pětk wjacor jo Gerold Gnausch z Barlinja pśewóźił to literarne zmakanje z krotkimi modernymi kusami na saksofonje. Organizatory su cytanje live nawjerśeli ako webinar na platformje „edudip“.