Gaž lěśe jo góruce, pón jo lod taka pšawa wochłoźeca chłošćonka. Dajo pak teke mazańce a torty, kenž su wochłoźece, take mězgojte, móžoš groniś: „lěśojske“. Taki pórucenja gódny lěśojski mazańc jo na pśikład kremojty citronowy mazańc. How Wam pśedstajijomy ten recept. Pśicynki namakajośo we šerem kašćiku napšawo. A tak to pśigótujośo:

Nejpjerwjej ma se łupina citrony wótšurowaś. Wutłocćo jadnu połojcu citrony, abo teke wobej, gaž to kisałe maśo raźi. Pón namažćo rozskócnu formu a topśo pjac.

Za dno mazańca rozměšajśo w šklě margarinu, 100 gramow cukora, jaji, łžycku pjaceńskego pulbjerja, łžycku citronoweje łupiny, pakśik waniljowego cukora a muku. Śěsto dejśo do namazaneje rozskócneje formy daś. Dno ma se něźi 15 minutow wupjac.