Karoline Lotrina (* 06.11.1919 –
† 19.06.2021).
Z Majberka/Maiberg. Wałtoru, 29. junija, jo był tužny źeń, ako su familija, susedy a wjele pśijaśelow pśewóźili Karoline Lotrinu (Lottra) k rowoju. Na majberskem kjarchobje su ju zakopali, w zemi jsy, kótaruž jo wóna jadno stolěśe dłujko znała. Dešańska faraŕka Katharina Köhlerowa jo powědała slědne słowa za nju na nimski, ale teke na serbski, w mamineje rěcy zamrěteje.
Ako jo wóna se naroźiła 6. nowembra lěta 1919 ako Karoline Kubicojc (Kuba), hyšći njejo Weimarska republika lěto stara była. W Depsku a w maiberskej koloniji jo wětšy źěl ludnosći hyšći serbował, tak ako Kubicojc familija. Ta jo była wjelgin bogata, dokulaž jo něga měła nejwětšu žywnosć we jsy. Pśisamem až do kóńca, ako jo 19. junija 2021 wumrěła z 101 lětami, jo Karoline tam žywa była. Wót styri źiśi jo wóna była nejmłodša, weto jo južo rano pomagała na domacnem dwórje. „Wšuźi jo tencas pěšy chójźiła“, wulicujo jeje šwigerźowka Regina Lotrina. „Wót Majberka do Chmjelowa jo šła gusy pśedawat a do Hažowa pśiswójźbnych woglědat.“