Z Města/Cottbus. Slědny tyźeń jo Šula za dolnoserbsku rěc a kulturu swój lětosny kompaktny kurs wjelgin wuspěšnje pśewjadła. Wósebnje zwjaselece jo, až lětosa su měli 54 kursistow a kursistkow – teliko, ako hyšći nigdy do togo! Na com to drje lažy? Wjednica teje šule, Uta Henšelowa, njejo se cele wěsta, wiźi pak wšake faktory. Jaden z nich jo drje korona: „Luźe kśě wen, kśě zasej gromadne aktiwity z drugimi, zasej ze serbski powědajucymi luźimi se zmakaś, kśě něco za głowu měś.“ Což wósebnje nadpadnjo a což ju wjelgin wjaseli: „Wjele młodych luźi smy lětosa měli! Cesto z rěcnymi pśedznaśami. Zajm tych młodych, serbsku rěc nawuknuś, drje rosćo. Wuměnjenja za to serbske w towarišnosći su se zazdaśim pólěpšyli.“ Pódla su byli teke cłonki „Kolektiwa Wakuuma“ kaž wuměłcowka Hella Stoleccyc a jeje bratš Arne Stolecki. Ale teke wótkubłaŕki a sobuźěłaśerje Domowiny su se wobźělili, wšake, kenž tu rěc za swójo pówołanje trjebaju. Za wětšy źěl su te kursisty pśišli z Města a wokolnych jsow. Dalej su se teke młoge z Drjeźdžan, Lubina, Barlinja a Pódstupima wobźělili.