Z Čorneho Chołmca/Schwarzkollm. W Dožywjeńskem dwórje („Erlebnishof“) Krabatowego młyna w Čornem Chołmcu se wótměju wót stwórtka, 8. julija, až do njeźele, 29. awgusta, filmowe nocy pód gołym njebjom. Pśedpśedań kórtow jo zachopiła slědny tyźeń, online móžośo se tiket wobstaraś pód schwarzkollm.filmnaechte.de. Tobias Zschieschick, jadnaŕ wót „Krabatmühle gGmbH“, woblutujo, až ako łoni teke lětosa njamógu se pśewjasć Krabatowe swěźeńske graśa. Wóni wjasele se pak, až za to nanejmjenjej mógu z filmowymi nocami južo zachopjeńk julija startowaś, tak až te mógu jaden mjasec dlej traś. Filmy pokazuju pśecej wót stwórtka do njeźele, dogromady jo 39 wjacornych pśedstajenjow zaplanowanych. Ako zachopjeńk, dnja 8. julija, docakujotej tych woglědarjow Bud Spencer a Terence Hill z filmom „Zwei wie Pech und Schwefel“. Dalej stoj na programje mjazy drugim „Mamma Mia! Here we go again!“ (22. julija), „Dirty Dancing“ (31. julija) a „Gundermann“, film pód režiju Grit Lemkoweje (22. awgusta). Do togo, až pokazuju „Gundermann“, wustupijo kupka „Die Seilschaft“ na jawišću w Čornem Chołmcu.