Fotografěrowaś, wótmólowaś – to ga źinsa pśisamem kuždy wumějo a teke cyni. Za to njetrjebaš ga tradicionalny fotoaparat abo kameru, ale za to dosega ten luby handy. Na kóńcu pak rozsuźijo to, lěc abo kak jo se ta „bildka“ raźiła.

Jaden, kenž garantěrujo pśecej wjelgin dobre a rědne fota, jo Erich Schutt z Chóśebuza, z połnym pšawom nejwěcej znaty a wjelgin wuspěšny fotowy žurnalist w cełej Dolnej Łužycy. Wušej 40 lět ga jo wón wšednje zastarał „Lausitzer Rundschau“ ze swójimi fotami a pśi tom su byli jomu „Praktica“ a „Pentacon“ a wósebnje wót lěta 1990 dalšne droge kamery z drugich krajow k pomocy. Fotografěrowaś z digitalnymi aparatami, mimo filmow, wó tom wón žednje wjele roźeł njejo.

Slědny tyźeń pónjeźele, 21. junija, jo Erich Schutt zešwyrnuł južo 90. lěto. Gromaźe z wjelikeju familiju (ze swójeju manźelskeju Anneliese ga matej pěś źiśi, a jaden wót tych synow jo źinsa rowno tak ako nan pśipóznaty casnikaŕski fotograf) su toś ten napšawdu wusoki jubilej swěśili a zawěsće pśi tej góźbje teke slědk glědali na wjele lět.