Z Dešna/Dissen. Srjodu tyźeń jo Młoźinski aktiw Domowiny se pó dlejšem casu prědny raz w prezencnej formje zmakał. A to ned na wósebnje rědny part: W Dešnje na Nowakojc dwórje, ga na terasy slězy kafejownje „Liska“, njejsu jano wótźěłali dnjowny pórěd, ale su měli teke spódobny gromadny grilowy wjacor. „To jo źěk za wšykne kupki, kótarež su se lětosa pśemyslili alternatiwy za zapust, a kótarež su majske bomy stajali“, jo rozkładł Marcus Kóńcaŕ, zastupny župan Domowinskeje župy Dolna Łužyca. Wón jo pówitał na tom zmakanju 19 młodych luźi z jadnasćo Domowinskich młoźinskich kupkow: Z Barbuka, Brjazyny, Dešna, Hochoze, Janšojc, Mósta, Rogozna, Turjeja, Turnowa, Wjerbna a Žylowa.