Z Města/Cottbus. Zachopjeńk togo lěta jo se forměrowała kupka młodych luźi ze serbskeju slězynu respektiwnje ze zajmami na serbskem pólu. Ta kupka ma prědk, rumy za dolnoserbsku (sub-)kulturu twóriś a wuwijaś, wósebnje we Chóśebuzu. Pśikład su jim te subkulturelne póbitowanja w Górnej Łužycy, kótarychž dajo we wjelikej licbje – mjaztym až w Dolnej Łužycy wiźe na ten part bejny brach. Toś ten „wakuum“ młodeje, alternatiwneje kultury co wóny „Kolektiw Wakuum“, ako sebje gronje, z idejami a akcijami połniś.

Kšute „jědro“ teje kupki wobstoj z někak 13 sobustatkujucych, zwětšego srjejź dwaźastych lět starych. K tomu jědroju słušaju mjazy drugim Maja Šramojc z Gołbina, wuměłstwowa studentka Hella Stoleccyc z Města (tuchylu ma wukrajne lěto we Awstriskej) a Maks Bagańc z Města, redaktor pla Nowego Casnika.