Budyšyn/Bautzen. Prof. dr. Dietrich Šołta, sobuzałožaŕ Serbskego instituta a 23 lět jogo wjednik, jo se sednuł na wuměńk. Pśi tej góźbje jo Serbski institut kazał pětk tyźeń do Małego zala Źiwadła na Groźe na dostojne a swěźeńske rozžognowanje. Direktor instituta na pśechodny cas dr. Hauke Bartels jo wuwitał jadnab 100 gósći. K nim stej słušałej bramborski a sakski statny sekretaŕ Martin Gorholt a dr. Henry Hasenpflug, a wušej togo pśedsedaŕ Domowiny Dawid Statnik, wjedniki serbskich institucijow a direktor Pódpołnocnofriziskego instituta prof. dr. Thomas Steensen.

Gorholt jo měnił, až z wótejźenim Dietricha Šołty dokóńcujo se era: Prof. Šołta ga jo pśisamem běrtyl stolěśa wót załoženja w lěśe 1992 institut wjadł – wón jo struktury z DDRskego casa wótnowił a pśigótował na pominanja pśichodnego casa. Pśez swójo slěźarske źěło a kontakty z wukrajnymi slěźarskimi institucijami jo wón sorabistiskemu slěźenju dał wažne impulse. Slěźarske wugbanja instituta su pśipóznate a we swěśe wědomnosći widobne. „Na to móžośo byś gjarde a za to se Wam wutšobnje źěkuju“, jo Gorholt gronił.