Z Njebjelčic/Nebelschütz. Slědnu sobotu jo Serbski sejm pśewjadł swójo 25. pósejźenje, to zasej we online-formje. Tam su na dnjownem rěźe doprědka śěgnuli wóny dypk, kenž pótrjefijo wideo z wóterymi wurězkami zachadnych zjawnych online-pósejźenjow togo gremiuma. Pód mjenim „wokolnik“ jo jadna anonymna „kupka młodych Serbow*kow“ wóne wideo z wótšymi a kontrowersnymi wugronami sejmikarjow wó Domowinje dnja 4. junija rozpósłała. Ten link na „vimeo“ pak njejo wěcej pśistupny. Sejmikarje su wuzwignuli, až ta za te nagrawanja zagronita kupka jo se pśeśiwo kazni wó šćiśe datow a pśeśiwo stwóriśelskemu pšawoju pśejšła, tak až Serbski sejm mógał pšawniske kšace na puś spóraś. Pósejźenja sejma su zjawne, gósći mógu se tam wugroniś. Ale sobunagraśa a jich wózjawjenje bźez pśigłosenja – to jo ilegalnje. Edith Pjeńkowa jo moněrowała, až te zagronite młode luźe dejali se sromaś, take něco do swěta rozchytaś. „Chto jo Wam taki nadawk dał?“, jo wóna pšašała. Teke medije jo kritizěrowała, kak su wobchadali z teju nastupnosću. Jo pokazała na dłujkolětny cesnoamtski angažement iniciatiwy sejma.