Z Dešna/Dissen. Na kóńcu maja togo lěta běchu delegaty na głownej zgromaźinje Domowinskeje župy Dolna Łužyca w Groźišću wuzwólili swójo nowe župne pśedsedaŕstwo ze 13 cłonkami, a wóno jo tam ned teke wuzwóliło dr. Pětša Šurmana ako nowego župana. Južo tyźenja pózdźej jo wón kazał na prědne pósejźenje, a to do Dešna. Pó dlejšem casu su se how zmakali zasej direktnje, nic we interneśe, ako pśi slědnych pósejźenjach, což su wšykne witali.

Nowy župan jo nowym a doněntejšnym cłonkam pśedsedaŕstwa a gósćam – mjazy nimi zastupnice Serbskeje rady a serbskeje załožby – krotko pśednjasł swóje prědne ideje a pśedstajenja wó swójom źěle a wó pśiducem źěle župnego pśedsedaŕstwa. „Za mnjo jo wjelgin wažne, až wěcej zapśěgnjomy zjawnosć do našogo źěła, rowno tak ako fachnikow a ekspertow na serbskem pólu“, jo wón wustajił.

Aby byli wobradowanja župnego pśedsedaŕstwa hyšći efektiwnjejše a wužytnjejše, by dejali cłonki dostaś pśed pósejźenjami wótpowědne naraźenja k jadnotliwym dypkam. Wjelgin wažne jo za dr. Šurmana, młodu generaciju hyšći lěpjej zapśěgnuś do źěła župy.