Z Turjeja/Tauer. Na serbsku namšu w Turjeju swětkowne pónjeźele stej pšosyłej Źěłowa kupka Serbska namša a janšojski faraŕ Ingolf Kśenka. Jadnab 40 luźi a mjazy nimi wjele znatych woblicow serbskego žywjenja jo na tom słyńcnem dnju gromadu pśišło, aby pśisłuchało prjatkowanjeju w serbskej rěcy.

Z wósebnym źiwanim na wótstawk a hygienu jo se malsnje połniła mała turjańska cerkwja. Pśed jeje wrotami stej stojałej fryšnej lebinje k swětkam. Zeger 14:00 jo faraŕ Kśenka pśiwitał wósadniki w serbskej a w nimskej rěcy na Bóžu słužbu. Pó zawjeźeńskich słowach a gromaźe z fararjom jo Vanessa Stegicojc cytała pasažu z bibliskich tekstow. Młoda studentka jo prědny raz namšy sobu statkowała, póchada z Turjeja a jo pśed tym chójźiła na Dolnoserbski gymnazium.