Ze Zaspow/Saspow. Južo wót někotarych lět wobstoj w chóśebuskem měsćańskem źěle „rozdora“ mjazy zaspickimi wobydlarjami a wobydlaŕkami glědajucy na pšašanje twari nowych domow. Zwada se wijo wokoło móžnych twaŕskich městnow, kenž změstymi su na stronach šćitaneje krajiny (Landschaftsschutzgebiet), ga we „Sprjewinej stronje Chóśebuz pódpołnoc“. Te jadne by se wjelgin žycyli, až mógu se tam dalšne familijne chromy twariś. Te druge to kšuśe wótpokažu. Luźe ze zaprědka spomnjoneje „zajmoweje kupki“ su se w lětosnem měrcu z peticiju na chóśebusku zgromaźinu wótpósłańcow wobrośili. Walter Kerbs jo ju wótpósłał, to pak teke w mjenju zaspickeje wejsneje pśirady a drugich wobydlarjow. Pód nadpismom „Wohnraumentwicklung in Cottbus – Wird der Ortsteil Saspow ausgemustert?“ argumentěruju wóni mjazy drugim, až rowno tek pśed slězynu strukturneje změny buźo to notne, nowy bydleński rum w Zaspach twóriś.