Zachadny pětk a sobotu su cłonki Serbsko-nimskeje seśi filmarjow „Łužycafilm“ digitalnje gromadu pśišli na 12. zmakanju seśi. W ramiku togo zarědowanja mógu se łužyske filmarje rozgranjaś, pśedstajiś swójske projekty a se dalej kubłaś. Wěcej ako 30 luźi jo se pśizjawiło, mjazy drugim powědarje seśi Sylke Laubensteinowa-Poleńcojc, Cosima Strakec-Nawkowa a Ola Staszelowa. Wše su se dermotnje wobźělili na rozgronach a workshopach, kótarež jo Załožba za serbski lud, w kooperaciji z Filmowym zwězkom Sakskeje, organizěrowała.
Góźba za zmakanje jo planowany 18. Filmowy festiwal Nysa był, kenž jo se pak pśesunuł do srjejź septembra. Weto su se wšake eksperty wobźělili na zmakanju, aby serbsko-nimskim filmarjam pokazali wósebnosći filmoweje branže.
Annegret Richterowa, jadnaŕka towaristwa „AG Animationsfilm“, jo pśibytnym pětk rozkładła wšake drobnosći z wobłuka animaciskego filma. Wóna jo pśedstajiła techniki a programy, aby stwórili animacije, tak ako žrědła za financěrowanje takich filmowych projektow.