Fryco Kitlaŕ jo se naroźił w Radowizy ako syn serbskego małego burja, dnja 19. oktobra 1891. Wumrěł jo dnja 22. maja 1981 w Měsće. Toś su byli slědnu sobotu 40. pósmjertniny togo serbskego ceptarja a ludowego wuměłca .
To wšedne, normalne žywjenje jo Fryco Kitlaŕ se dokradnje wobglědał a w swójom wuměłstwje pśedstajił – mjazy drugim krajiny swójeje domownje, portrety, zwěrjeta, rostliny a źěłowe procese. „Wón jo měł nutśikowne rozměśe za wšedny wobswět“, pśinjaso to Christina Kliemowa, kuratorka w Serbskem muzeju w Měsće, na dypk. Z jeje wida rezultěrujo rowno z togo ta atraktiwnosć Kitlarjowych twóŕbow za wjele recipientow.
Wósebnje znaty jo wón za wustśiganki, kenž jo nagótował z carneje abo pisaneje papjery, pśedewšym z ludowuměłskimi motiwami, z radneju zamóžnosću. Ale wobkněžył a nałožył jo wjeliku paletu technikow. Wšake śišćańske techniki k tomu lice, teke pastele a akwarele jo mólował, do linoliuma jo rězbnił, wuglowe kreslanki gótował. Wěcej znatosći jo drje teke dojśpił za wugótowanje pismowych łopjenow z psisłowami ako teke z basnjami Miny Witkojc, Mata Kosyka abo Fryca Rochy.