We 16. lětosnem wudaśu Nowego Casnika ( 22. apryl 2021) smy mógali cytaś, až Zwězkowy sejm jo samski mjasec dojadnanje Mjazynarodneje źěłoweje komisije – ILO za šćit wó domorodnych a w rodach žywych ludow w njewótwisnych krajach ratificěrował (ILO 169). To jo lažko było, dokulaž pó měritkach takego UNO-gremija njepłaśe awtochtone mjeńšyny kaž Serby abo Frize ako domorodne. Jadnučki europski lud, kótaryž jo za ILO „indigen“, pótakem domorodny, su skandinawiske Sámi. Drje pśeraźijo jich źewjeś rěcow, až póchadaju ze stron Urala, kaž Finy, Esty a Hungory. Ale dokulaž Sámi su hyšći žywe w rodach a góspodariju pó tradicijach (nejwětšy źěł Sámow kublo soby), płaśe ako indigenski lud.

Toś ten glěd na domorodne ludy móžoš nic jano dla wogrěwanja klimy do pšašanja stajiś. Njejo ga wina Serbow, až wót lěta 963 nimske krale su kšac pó kšacu politisku organizaciju serbskich rodow znicyli. Teke njejo wina Lěžanarjow, až lěbda něchten jo tam źinsa hyšći žywy wót rolnikaŕstwa a rybaŕstwa, ale skerjej wót turizma.