Trjebin swój pśinosk na Lichotny stat wusajźijo

Trjebin/Trebendorf. Gmejna Trjebin móžo swój etat za 2016 jano z nabejnymi zažarjenjami a z pśetrjebanim rezerwow nastajiś. „Musymy dłymoko do našych rezerwow pśimaś a toś se wóni masiwnej pómjeńšyju“, jo pódšmarnuła šołtowka Kerstin Antonius (wólarske zjadnośeństwo Trjebin) na slědnem zejźenju gmejnskeje rady a jo jasnje wustajiła: „My njejsmy sami wina, až smy do teje situacije zalězli.“

Nacerjenje etata něnto pśedlažy. Wón pśedwiźi pówušenje gruntowych dankow B za wobtwarjone grunty a za take, ako se daju hyšći wobtwariś. Pówušyś dej se teke kasowy kredit. Až dotychměst jo gmejna jen póstajiła na 100.000 euro. Lětosa planujomy nejskerjej ze 400.000 euro kasowego kredita“, jo pśipowěźeła komornica Carmen Petrick. Wóna licy lětosa w kóńcnem etaśe z deficitom.