Moto Ekumeniskego cerkwinego dnja we Frankfurśe (13.–16.05.) jo było „schaut hin!“ (Glědajśo!). Beatrice von Weizsäckerowa jo to reflektěrowała. Wóna jo cłonk prezidiuma Nimskego ewangelskego cerkwinego dnja a 3. Ekumeniskego cerkwinego dnja 2021. „Ako prezidium jo se rozsuźił za moto Ekumeniskego cerkwinego dnja (ÖKT), jo hyšći wšo ‚normalne’ było. Něnto jo wšo digitalne. Źo dejmy glědaś a statkowaś w ekumenje, w tuchylnych towarišnostnych wupominanjach? Źo wóstanjo Bog? Co hyšći groni ‚glědajśo’? To jo politiski wukaz. Wšak jo wjele njewěste a wobzwadne. Wušej togo jo wuzwólowańske wójowanje. Tam se rad tłuco. To njetyjo glědanjeju a słuchanjeju. ‚Glědajśo‘, to jo teke pšosba na cerkwju. Wjele brachow a njedostatkow jo we wjelikima cerkwjoma: to wobchadanje ze seksualizěrowaneju namócu, pšašanje žognowanja homoseksuelnych pórow a zgromadna eucharistija, Bóže blido. Ale ÖKT njejo ‚ta cerkwja‘, ale gibanje lajkow. A co nam, lajkam, to moto groni? Bźez póśěgow na Boga a Jezusa to njegroni wjele. ‚Glědajśo’ móžo stojaś w programje partajow, wšuźi. Ako grono ÖKT to ryjne ‚Glědajśo’ spadnjo, wordujo floskla.