Z Turnowa/Turnow. Jaden, kenž ako bur źěła a pśi tom wjelgin na ekologiju, na ekologiske, biologiske góspodarjenje glěda, jo Arne Rost w Turnowje pla Picnja. Roźony w Janšojcach jo rolnikaŕstwo studěrował a jo pśewzeł wót swójeje starkeje w bliskem Turnowje burski dwór a k tomu póla a druge płoniny. Załožył jo „Biohof“, a ten ma swóje twarjenja pśi głownej droze wósrjejź jsy. „Ja južo pśecej lubujom burske źěło, a tak njejsom dłujko pśemyslował pśewześ žywnosć swójeje starkeje w Turnowje. Njejsom ga kśěł, až to wumrějo, cu to dalej wjasć“, wón groni.
Dogromady wobźěła něnt něźi 40 hektarow, a te laže za wětšy źěl mjazy drogoma do Luboraza a do Hochoze. Wótwardowaś co teke krowy, wósebnje dla mloka. Tych prědnych 15 južo ma, dalšne deje k tomu pśiś.