Chóśebuz/Cottbus. 27. apryla jo se zmakał w Serbskem domje serbski wuběrk wokrejsa Sprjewja-Nysa (SPN). Zwětšego su se dali informěrowaś ku tśim temam: knigłam wót starego wokrejsa Chóśebuz, dr. Viktor Zakar jo se pśedstajił ako nowy wjednik chóśebuskego wótźělenja Witaj-centruma a k planam kraja Bramborska.

Knigły „Wokrejs Sprjewja-Nysa a jogo serbska kulturna historija. Něgajšny wokrejs Chóśebuz“ jo pśedstajił dr. Pětš Šurman wót Serbskego instituta ako 9. wudaśe rěda „Serbske drogotki“. Ten rěd wujźo w Serbskem muzeju, a tamna kuratorka Martina Nowakowa jo měła gromaźe z knězom Šurmanom redakciju tych knigłow. Wón jo we swójom pśednosku wustajił, až su tam wózjawili kopicu nowych informacijow. Na pśikład su mógali pśez to interdisciplinarne źěło wuzgóniś, až te serbske napisma w kloštarskej cerkwi w Chóśebuzu njejsu wót lěta 1908, ako su pśecej se myslili, ale južo někak 50 lět starše. Pla wejsnych chronistow su te knigły kradu woblubowane, jo Šurman pódšmarnuł. Dalšne informacije su byli w slědnem wudaśu NC.