Wót 22. až do 24. apryla jo była zasej akcija 48 góźin wót towaristwa „Bramborska wejsna młoźina“ (Brandenburger Landjugend e. V. , BBL). Kužde lěto w nalěśu wužywaju jaden kóńc tyźenja, aby we swójej jsy raz pšawy pórěd wugótowali a něco za pógromadnosć wugbali.
Wobźěliło jo se lětosa dogromadu 65 kupkow młoźiny, dogromadu jo jich było wušej 1.000 luźi. We wokrejsu Sprjewja-Nysa su na pśikład w Gołkojcach młoźinsku śpu ewangelskeje wósady rědnjejšu wugótowali. Wence su měli śěžke źěło: su wuryli stare kórjenje.