Z Města/Cottbus. Chtož něnto jěźo z Chóśebuza pó droze L 49 do Baršća, ten wiźi ducy na tej droze bejnje wjelike twaŕnišćo. A to krotko pśed kśicowanišćom z amplami, źož wótbocyjotej droga k janšojskej jamje a droga L 49 do Derbna/Döbern a dalej do Zgórjelca/Görlitz. Tam se twari tuchylu wjeliki a šyroki móst nad drogu. Ten pak njejo myslony za awta abo za luźi, ale za zwěrjeta, za źiwinu. Nejpózdźej w lěśe 2022 dej byś wóna dotwarjona.

Dla cogo to wšykno? Planowane ga jo, až ma se twariś na wšakich źělach nowa spěšna droga kołowokoło Chóśebuza. Pó tom njemuse te, ako pśidu na pśikład wót Grodka a kśě do Baršća, wěcej jěś pśez cełe město. Pód tym śerpje wósebnje wobydlarje w Módłeji/Madlow a Gołynku/Gallinchen. Tam ga lice kuždy źeń něźi 10.000 wjelikich a mjeńšych awtow. Wóni mógu pón město wobjězdźiś. Ta nowa droga se zachopijo pśed Gogolowom/Groß Gaglow, wjeźo mimo Dubrawki/Frauendorf, pód awtoweju drogu A 15, mimo Kórjenja/Kahren a dalej blisko L 49.