W pandemiskich casach, z kótarymiž musymy nejskerjej hyšći bejny cas licyś, njamžoš jadnorje do Italskeje jěś a sebje w Milano w tamnjejšej cerkwi S. Maria delle Grazie sławny wobraz „Bože blido“ wót Leonardo da Vinci woglědaś, kótaryž jo ten mólaŕ, bildaŕ, twaŕski mejstaŕ, slěźaŕ... w lěśe 1496 stwórił. Teke „Sixtinisku madonu“ wót Raffaela, dalšnego italskego mólujucego mejstarja njamžoš sebje w originalu woglědaś, rownož su až do Drježdźańskeje galerije lěbda sto kilometarjow. Groni se, až maju luźe w takich njewšednych – lubjej gronim wóstudnych – casach pśidatny lušt, se wót takich a drugich mejstaŕskich źěłow wózbóžyś daś.