Druge lěto ma pandemija nas zaźergnjonych. Lockdown dalej trajo, źiwadła su za publikum zacynjone... Póžedanje za kulturu jo pak wjelike. Toś młoge se pśeměstnijo do digitalnego swěta, aby nanejmjenjej doma, źož smy mjazy našymi styri sćěnami zawrěte, kulturu na wobrazowce dožywiś mógli. Jo ga mócnosć kultury, rowno źiwadła, wobstojnosći pó wuměłskej wašni reflektěrowa, z nimi zwězane zacuśa pśedstajiś.

Take jo gano se raźiło Serbskemu ludowemu ansamblu (SLA). Zachadny tyźeń pětk su pokazali online, w live-streamje, baletowy wjacor z titelom „einRAUMwohnung/We Stwičce“. Ten jo wuslědk wuměłskego wobchadanja z pandemiju, z lockdownom, z luźecym zacuśim na ten part. Na kreatiwnu wašnju su ga wužywali cas njedobrowólneje jawišćoweje pawze. Wósym choreografow, mjazy nimi baletowa mejstaŕka SLA Mia Facchinelli, jo choreografije wuwiło, kótarež swóje perspektiwy na tu situaciju zwurazniju.