Z Opola/Oppeln. Prědnego apryla jo zachopiło ludowe licenje w Pólskej, kótarež trajo až do 30. junija. Hynac ako w Nimskej, źož dostanjo kněžaŕstwo wětšynu datow z registarjow a na zakłaźe lubowólnych probow, jo obligatoriske licenje w Pólskej zwězane z formularom. Hynac ako w Nimskej, napomina ten pólski system ludnosć, aby pódała – mjazy drugim – wósobinsku narodnosć a we familiji wužywanu rěc. Wósebnje za cłonki narodnych a etniskich mjeńšynow w Pólskej ma to statne napšašowanje togodla wósebnu brizancu.