Z Pódstupima/Potsdam. Stwórtk, dnja 25. měrca, pśi góźbje 40. pósejźenja Krajnego sejma Bramborskeje, su wótpósłane mjazy drugim wobradowali wó rěcnych kupkach w kraju. Frakcija Lěwice jo w decemberje pśizjawiła wjelike napšašowanje (Große Anfrage) na krajne kněžaŕstwo Bramborskeje, glědajucy na wuźěłanje koncepta za wěcejrěcnosć. Na zakłaźe togo su frakcije SPD, CDU, Zwězk90/Zelene a Lěwica wuźěłali gromadne póžedanje, aby tak wutwarjali wěcejrěcnosć w Bramborskej. Koncept su w Krajnem sejmje južo někotare lěta tematizěrowali. Wósebnje pólska rěc dej se zapśěgnuś do pśichodnego koncepta, ale teke dolnonimska a dolnoserbska rěc tak ako Romanes (rěc Sinti a Roma).