Ze Słopišćow/Schlepzig. Wót 19 lět pśinjaso mjazynarodny festiwal „aquamediale“ we kuždem drugem lěśe pśitomnostne wuměłstwo do Błotow. Projekt, kenž jo iniciatiwa wokrejsa Dubja-Błota, jo lětosa we Słopišćach zaměstnjony. We tamnem Łužyskem wuměłcowem domje EISENHAMMER reziděrujo jadnasćo mjazynarodnych wuměłcow a wuměłcowkow a pśigótujo swóje wuměłstwowe twóŕby, ako deje se wustajiś wót lětosnego junija do septembra w Słopišćach. Slědnu sobotu wjacor su w live-streamje prezentěrowali prědne póglědy na pśedłogi tych wuměłcow a wuměłcowkow. Mjazy nimi jo na pśikład Marie Annick le Blanc z Francojskeje, Sol Namgung z Koreje, Mark Swysen z Belgiskeje a Robin Zöffzig z Nimskeje. Wšykne źěłaju gromaźe z rucnikarjami, pśeto moto lětosneje aquamediale jo „Hand Werk Kunst“. To stej rozkładłej na zachopjeńku online-pśedstajenja Harald Larisch, kurator aquamediale, a projektowa wjednica Anika Meißnerowa w Błośańskej piwaŕni we Słopišćach. Ta slědna jo se ze wšakimi wósobami rozgranjała, mjazy drugim z piwowaŕskim mejstarjom Uwe Zechom.