Z Bórkow/Burg. Barufkojc Juliane jo 34 lět stara a jo wótrosła ako wšedna Bórkowaŕka. Wóna jo tudy chójźiła do šule, jo była serbšćinaŕka a jo wustupiła na domacnem swěźenju. Tak daloko, tak njesensacionelne. Gaž „Jule“ pak powěda wót swójogo pówołańskego žywjenja, ga móžo se jaden jano źiwaś. Pó šuli jo wóna se wukubłała ako fyzioterapeutka w Barlinju, a jo rada šła se woglědat Mjazynarodne wiki za turizm ITB. Tam jo drogowańska firma „alltours“ jej póbitowała, až móžo we ferijowych hotelach na balearskich kupach pśewóźowaś turisty, což nastupa fitnes a animaciju. To jo kśěła, a jo teke na kanariskich a grichiskich kupach źěłała. Wóna jo była wósobinska trenaŕka, ceptaŕka za pódnurjenje a jo profesionelnje pśewóźowała kólasowańske tury. „To jo było wótměnjate, wjelebocne. Som wjele dolabowała. Pó telik lětach w pódpołdnjowej Europje jo se mě zasej kśěło zymy a sněga a som šła do Awstriskeje. Wót januara do apryla 2018 som statkowała ako fyzioterapeutka, maserka a trenaŕka za fitnes w ,Grand Resort Zürserhof‘ pśi Arlberg.