Z Bórkow/Burg. Towaristwa njejsu tuchylu tak aktiwne ako howacej, korony dla. Kak wuglěda pla serbskich rybakarjow? Wó tom jo wulicował Marten Oppermann z Bórkow, cłonk Zjadnośeństwa serbskich rybarjow we Błotach a wokolinje. Wón jo gronił, až njamóžo skjaržyś. „Źěłam za firmu EuroFineFish, librujomy ryby do supermarkow. Luźe su wěcej doma a warje, to markujomy. W lichem casu som rybakaŕ. Jo wódychanje, we Błotach w měrje ryby łojś. My serbske rybakarje smějomy łojś jano za ‚swójski gjarnc‘“, jo twarźił. Źož korona zbroj bórkojski turizm, tam se natura wódycha, wón groni. Jo wiźeś, kak bomy a zwěrjeta se zasej bliže domam, sarnje pśidu bližej a ryby njeworduju mólone. Wótemrěśe družynow jo teke we Błotach problem. Wšakich zwěrjetow pak jo pśewjele, což płaśi za bobry. Na někaki part słušaju k Błotam, napóraju pak teke škódy. Dalšny problem jo nutrija, groni ten rybakaŕ: „Nutrija jo ploga, wóna wšo zeźerjo. Wóna knapjo mušle a źerjo ryby a propy, kenž wužywamy, gaž pólěcyjomy seśi. To njejo wěcej měra. Nutrija móžo se mjaztym góńtwowaś, ma pak teke źiwinowy měr.“