Pódstupim/Potsdam. Slědny tyźeń jo póstajił głowny wuběrk krajnego sejma w Pódstupimje, až kśě Kalawu/Calau a Lubin/Lübben do serbskego sedleńskego ruma pśiwześ. Toś to rozsuźenje jo było ten rozsudny dypk za pśiwześe městowu. Něnto dej se hyšći wót ministarstwa za kulturu městoma wobwěsćenje pósłaś, až stej oficielnej pśiwzetej. Tam budu teke mjenja tych wejsnych źělow Kalawy a Lubina w serbskej rěcy oficielnej póstajonej. Stakim su pó nowej serbskej kazni něnto Łukojce/Wiesengrund, Kalawa a Lubin nowe w serbskem sedleńskem rumje.

Slědny tyźeń jo gmejna Gójacki jazor/Schwielochsee pśeśiwo tomu wótgłosowała, až budu w serbskem sedleńskem rumje. W amśe Luboraz/Górne Błota, źož ta gmejna jo, su nanejmjenjej južo wót 1990ych lět Tšupc, Nowa Niwa a Běła Góra/Bělin w serbskem sedleńskem rumje.

Teke slědny tyźeń jo Uta Henšelowa ako powědarka Domowiny a cłonk Serbskeje rady informěrowała zstupniki gmejny Derbno/Schenkendöbern. Tamny šołta jo ju pśepšosył. Wóni budu w maju wótgłosowaś. Njepjerwjej njejsu se k tomu wugronili.