Bórkowy/Burg. 9. Noc powěsćow buźo lětosa swětki w Bórkowach. Drugi raz jo Serbski ludowy ansambel (SLA) wugótowaŕ togo wjelikego spektakla pód Bismarckowym tormom. Łoni su pśiwabili 5.000 woglědarjow.

Powěsć wót serbskego krala Pśibysława źo dalej. Jogo lubka Lina, błośańske źowćo, dostanjo góle wót njogo. Jogo manźelska Wóda jo pósromana. Falšna a zakśebjatna ako jo, wumyslijo sebje lasć. „Lasć/Die List“ jo teke titel lětosnych graśow. Ako głownej wósobje stej zasej lutka Jolka a Jorko pśipódla. Wónej stej byłej łoni lubuška publikuma. Lětosa drje buźotej na kóńcu tomu zadoraś, aby rownowaga mócow w Błotach se njezgubijo. Wuž ga co Wódu ako manźelsku a ma kronu wót swójeje mamy, wužoweje kralowki.

Ako pśecej w slědnych pśedstajenjach buźo teke lětosa serbska rěc w dialogach a spiwach pśipódla. Pśestajił jo Werner Měškank. Režiser Stefan Haufe jo gronił, až jo wjelgin narski na taku wašnju dwójorěcnego źěła. To jo za wšyknych wósebne wupominanje, jo gronił. Grajarje na pśikład se jogo pšašaju, dla cogo deje sadu dwójcy groniś: raz serbski a raz nimski.