Wóna kompletěrujo na wizuelnu wašnju powědanu abo cytanu serbsku rěc. Toś ta tak pomjenjona symboliska rěc jo rowno tak gódna ak wažna. Pomjenjenja jsow, městow, wejsańskich a měsćańskich źělow abo drogow, pomjenjenje teje abo tamneje institucije, jo mały móžny źěl dwójorěcnosći w zjawnosći. Mamy ju něnto wěcej ako 50 lět. Z unikatnym serbsko-nimskim plakatom z cerkwinym gronom lěta w dolnoserbskej a górnoserbskej warianśe pśinosujo Spěchowańske towaristwo za serbsku rěc w cerkwi juž pěte lěto k tomu, aby se dwójorěcnosć teke optiski w bramborskej a sakskej cerkwi etablěrowała. Cłonki pśedsedaŕstwa staraju se wó to, aby pśišli plakaty do wósadow. Tam wise pśez lěto w informaciskich kašćikach. Mamy chwalobne pśikłady we wšakich wósadach. Wise tež pśi Serbskich cerkwjach w Baršću, Brylanźe, Chóśebuzu, Grodku, Gubinje, Kalawje, Lubinje, Luborazu, Łukowje, Wětošowje, Złem Komorowje.