Digitalna platforma Źěłanišća za serbske kubłańske wuwijanje Chóśebuz „ABC Sorbisch/Wendisch“ jo online wót kóńca januara. Toś ta powěsć jo šła tyźeń do zymskich proznin do šulow ze serbskeju wucbu. Pśisamem tśi lěta jo trało, aby rědowali format, financěrowanje, juristiske zapołoženje, strukturu, wužywanje a administraciju. Ministaŕstwo za kubłanje, młoźinu a sport Bramborskeje (MBJS) ako teke Statny šulski amt Chóśebuz (StSchA-CB) stej se wobźěliłej. Platforma wopśimjejo wšake materiale za pódpěranje serbskorěcneje wucby. K tym słušaju na pśikład źěłowe łopjena, rěcne pomocy, awdio-teksty a graśa, teke didaktiski material, aby pógódnośili wugbaśe wuknikow. Platforma jo šćitany webbok za ceptaŕki a ceptarjow. Na tom se namakajo wuwucowański material, ako mógu wucabniki pśeźěłaś a tak pśiměriś na konkretnu wuknjeńsku situaciju. Mimo togo deje se na platformje jawiś rědowniske źěła abo klawsury. Togodla jo wažne, až se stawnje wuwija wugótowanje z materialami paralelnje ku klasiskim śišćanym materialam.