Wurězk z kreslanki, kótaraž pokažo měšańcu serbskich a realnosocialistiskich motiwow. Foto: priwatne

Z Města/Cottbus. Zachadny pětk, dnja 5. měrca, jo se pśi online-konferency pśedstajiła nowa studija „Serbske ludowe wuměłstwowe kupki w DDR“. Ta jo se srjodu wózjawiła a słuša k projektoju „Walorizacija serbskego kulturnego derbstwa za Łužycu“. Ten jo se zachopił 2019 a se skóńcyjo kóńc lěta 2021. Zagronitej za studiju stej byłej wuměłcowka Maxie Heinerowa a socialny wědomnostnik Daniel Häfner wót Łužyskego instituta za strategiske póraźowanje (Lausitzer Institut für strategische Beratung GbR). Gromaźe z drugimi pomocnikami stej gromaźiłej rozdrosćony material kupkow, kótarež su dalej wuwijali ludowe wuměłstwo Serbow w DDR. 130 takich kupkow jo jano w tencasnem wobceŕku Chóśebuz aktiwnych było, njeglědajucy na drugu kopicu w Sakskej. Organizěrowane su byli mjazy drugim we Wobwodowem kabineśe (Bezirkskabinett) za kulturne źěło Chóśebuz (BfK). „Smy dostali wjelgin pozitiwne reakcije, ako smy pytali za materialami a wuměłcami togo casa“, jo gronił Daniel Häfner.