Z Janšojc/Jänschwalde. Wót akciskego zwězka pśeśiwo spalaŕni wótpadankow na terenje janšojskeje jamy jo Nowy Casnik južo pisał. W Janšojcach a Mósće jo wjele lylowych kśicow wiźeś ako znamje njewobjadnosći k planam firmowu LEAG a Veolia, pór jich wisy w Picnju, Pśiłuku, w góli pśi janšojskej jamje a hynźi. Wěcej ako 70 kśicow su luźe se powjesnuli na wrota, płoty a źurja, jo groniła Heide Šinowscyna wót togo zwězka. Co zwězk konkretnje cyni, smy se ju pšašali? „My se pšawidłownje online zmakajomy, jadnab 15-20 luźi, zwětšego z Janšojc. Dogromady jo jadnab 80 luźi pódla. Na zmakanjach powědamy wó pśichodnych terminach. Na pśikład buźo w aprylu fachowe rozgrono w Bramborskem sejmje k temje, Krajny wobswětowy amt tuchylu pśepytujo napśeśiwjenja ako su dojšli ako reakcija na planowanja. Wuslědki budu kóńc apryla, zachopk maja jasne. A 18. měrca buźo wjacor profesor Christian Jooß wót uniwersity w Göttingenje online wulicowaś, kak se spalaŕnje wótpadankow wustatkuju na strowotu. Kuždy móžo se wobźěliś, a se pśizjawiś na www.aktionsbuendnis-contra-mva.de/index.php/kontakt.