Z Depska/Döbbrick. Južo wjele tyźenjow njejo se nic tšojło pla młoźiny w Depsku, tych 30 młodych luźi jo se cuło ako „wótšaltowane“ wót swěta. Kontakty pśez „nowe medije“ njejsu mógali dowurownaś zmakanja a swěźenje, kótarež su do togo žywjenje wobogaśili.

„Gaž glědamy do kalendera, ga wiźimy: Jo jano hyšći styri tyźenje do jatš. A jatšy zachopiju z jatšownym wognjom. Pomałem cwiblujomy: Budu nam napšawy pśeśiwo rozšyrjenjeju korony skazyś to zmakanje?“, jo groniła Franziska Weichertojc. Wóna jo lěta dłujko nawjedowała depsćańsku młoźinu. Něnto muse jeje naslědnica Luisa Nowcyc (Nowka) se plogowaś z koronu-napšawami. Weto jo wóna optimistiska. Wóna nadalej wěri, až móžo młoźina wjacor do 1. maja stajaś majski bom na terenje športojskego kluba „VfB Döbbrick“. Naźeja jo, až to stajanje togo boma buźo kšoceń do normality we tom lěśe. Wšak cakaju hyšći dalšne wjeraški we tom lěśe, źož młode luźe kśě gromadu pśiś.