Z Města/Cottbus. Kooperaciske zjadnośeństwo Góspodaŕski region Łužyca (Wirtschaftsregion Lausitz GmbH – WRL) wobstoj z bramborskich wokrejsow Górne Błota-Łužyca, Łobjo-Halšter, Sprjewja-Nysa, Dubja-Błota a z města Chóśebuz. Zaměr zjadnośeństwa jo spěchowaś góspodaŕstwo a stakim strukturnu změnu we Łužycy. W lěśe 2009 jo wóno se załožyło ako Energijowy region Łužyca-Błota (Energieregion Lausitz-Spreewald GmbH) a 2017 jo se pśefirměrowało, teke noweju partnarjowu w Sakskej dla. Tej, wokrejs Budyšyn a Zgórjelc, stej łoni pak zasej wustupiłej, aby pśistupiłej pódobnemu sakskemu zjadnośeństwoju.

Znaty projekt, wó kótaryž jo se WRL mjazy drugim starał, jo była Pśichodna źěłaŕnja Łužyca (Zukunftswerkstatt Lausitz). Wóna jo 2017 nastała, aby wuźěłała wuwijańsku strategiju za Łužycu. Łoński oktober, na kóńcu projekta, jo źěłaŕnja wózjawiła strategiski katalog z titelom „Strategija za wuwiśe – Łužyca 2050“. Ten jo tuchylu w krotkej formje teke pó serbsku a pód www.zw-lausitz.de/downloads.html pśistupny.