Z Rogeńca/Branitz. Tśiźasća wěncow su zagrodniki a zagrodnice załožby wjercha Pücklera slědny stwórtk wótpołožyli pśi Egyptojskej stupnicy pśed jazoroweje pyramidy, w kótarejž jo wjerch Hermann Pückler-Mužakojski zakopowany. Su to cynili ku góźbje 150. pósmjertnego dnja, togo stwóriśela Rogeńskego parka. Mimo togo mamy lětosa to 175. lěto wobstaśa Rogeńskego parka.
Wót nakrajneje pyramidy su wóni śěgali w mjelcecem wopomnjeśu až k Egyptojskej stupnicy, źož su te stykane kwětki wótpołožyli. Pódla jo była teke parkowa mejstaŕka Karina Müllerowa: „Som glucna, až ja w srjejźi swójogo pówołańskego žywjenja w parku wjercha źěłaś směju. Cujom se cesćona, we zmysle wjercha Pücklera źinsa w Rogeńskem parku statkowaś“, jo rozkładła ta angažowana zagrodowa mejstaŕka. Zagrodnik bomkaŕnje Holger Terno jo dodał: „To jo wjelike wuznamjenje, směś w Pücklerowem parku statkowaś. Jo wuběrnje, kuždy źeń cyniś měś z derbstwom Pücklera a k tomu pśinosowaś, derbstwo togo wjercha wobchowaś. Jo rědne, až my z našeje bomoweje uniwersity smy pioněry za ten projekt.“