26. januara 2021 jo Annemarie Matśeńcowa z Bórkow swěśiła swój 90. narodny źeń. Jo se naroźiła a wótrosła w Bórkowach. Starjejšej stej byłej serbskej, a se wě, až su źiśi musali na burskem dwórje pomagaś. Tak jo wšo derje znała, źěło na roli, w gumnje a groźi.

Za jeje źiśecy cas jo se we jsy wjele serbski powědało. Južo ako źowćko jo wót małego nosyła serbsku drastwu, a teke pózdźej na swěźenje a na reje jo chójźiła burska. Sedymnasćolětna jo se wobźěliła na górnoserbskem kursu w Chrósće (Crosta). 1949 jo chopiła pśi prědnem sekretariaśe Domowiny ako sekretaŕka źěłaś. Wót 1952 jo była sekretaŕka na Serbskej rozšyrjonej wušej šuli (SRWŠ). Wšykno, což jo za to źěło musała wuměś, jo sama nawuknuła. Teke to serbske pisanje.

39 lět jo na tej serbskej šuli źěłała. Jeje źěło jo było jeje druge doma, wóna groni. Jo znała kuždego wuknika. Młogi jo se pó studiju zasej do domownje wrośił a źěłał w serbskich institucijach abo ceptarił na serbskej šuli.

Žednych jo na jubilejnych swěźenjach zasej zmakała. Až su mógali hyšći serbski powědaś, k tomu jo teke Annemarie Matśeńcowa w šulskem casu pśinosowała.