Z Města/Cottbus. Wót młogich lět se źěła pód motom „jo!zatebje“ na rěcnopolitiskich a rěcnopraktiskich konceptach za wóžywjenje dolnoserbskeje rěcy. Měto Nowak, kenž wóne procowanja ako koordinator Serbskeje akciskeje seśi doprědka spóra, jo pónjeźele, 8. februara, Dolnoserbskej bibliotece w Chóśebuzu něźi 20 mjazynarodnych wědomnostnych knigłow z priwatnych wobstatkow, fachowu literaturu k temje rěcneje rewitalizacije, pśepódał. Zakładna mysl togo pósćenja jo, až móžo se hynźi na swěśe zběrana wěda w zwisku z rewitalizaciju jadneje wobgrozoneje rěcy teke pla nas, za dolnoserbsku rěc, wužywaś. Wuknjenje ze wšakich pśistupow, źělenje wědy – to ma Měto Nowak za wažne. „W zjawnje pśistupnej Dolnoserbskej bibliotece ma něnt wěcej zajmcow móžnosć, se wó pšašanjach rěcnego planowanja a idejach k rěcnemu pósrědnjenju informěrowaś, ako gaby te knigły w priwatnej pólicy stojali“, wón groni. Sabine Siegowa wót Załožby za serbski lud se wjaseli tomu pósćenju: „Něnto móžomy teke same rěcne planowanje we Łužycy pódpěraś z tym, až móžomy fachowu literaturu k dispoziciji stajiś.“