Chtož pyta w interneśe nejnowše informacije z Chóśebuza abo teke pokazki za politiske kulturne a druge zarědowanja w měsće, ten ma wót kóńca měrca za to lěpše a modernjejše móžnosći. 30. měrca ga jo měł nowy internetowy bok www.cottbus.de swóju premjeru. Jen móžoš teke wužywaś z mobilnym rědom, ako su to smartfony a tablets. Informacije se pódaju w nimskej rěcy, a wětšy źěl teke w engelskej, pólskej a dolnoserbskej rěcy. Teke wó tom serbskem su pśecej aktualne informacije k cytanjeju, tež z wótpowědnymi fotami.

Za nowy internetowy bok su se starali głowne něgajšne a něntejšne studenty Bramborskeje techniskeje uniwersity. H. A.

Jadna funkcija, ako jo na internetnych bokach města wjelgin wužytna była, jo ten dwójorěcny pśeglěd mjenjow drogow. Wón tuchylu njejo na bokach města, ale buźo zasej pśiś, jo Casnikoju pśilubiła Anna Kosacojc-Kozelowa, zagronita za serbske nastupnosći w Chóśebuzu. Za te technikarje jo to wjelicke źěło, jo groniła, a dla togo buźo ten dwójorěcny zapis, tak ako teke druge funkcije na bokach města, pitśku pózdźej zatwarjony.