Janšojce/Jänschwalde. Za tych sedymjoch hobby-mólarjow, kótarež rozpokazuju něnto swóje mólowanja w janšojskem muzeju, jo to było dostojne wótwórjenje wustajeńce na 12. aprylu. Z pomocu Doreen Hufnageloweje z Domowinskeje kupki a dweju cesnoamtskeju pódpěrarjowu muzeja Karla Freitaga a Siegfrieda Krawca jo wšykno było perfektnje organizěrowane. Na gluku jo gmejnski sobuźěłaśeŕ Micha Kocur hyšći flink 20 stołow do jśpy pśinosył, tak až wšykne woglědarje su namakali město k sejźenju we tej wuskej śpě muzeja. Šołta Helmut Badtke jo k pśiwitanju gósćow rědne a chytše słowa gronił a wulicował wót swójich prědnych myslenjow, ak su jomu pśez głowu lětali pśi glědanju na bildy. Krawc a Freitag stej w serbskej a nimskej rěcy we mjenju muzeja tu wustajeńcu pócesćiłej. Lawdaciju k cesći tych 13 „mólarjow picańskich stronow“ jo źaržała spisarka toś tych smužkow. Pšawe wochłoźenje za wušy woglědarjow jo była muzika, kótaruž jo na klawěrach grał Marcus Mittwoch z Drjejc. Wón jo wugbał, až to zachopne napněśe pla akterow jo spadnuło.