Chóśebuz/Cottbus. To jo było wažne rozsuźenje. W Chóśebuzu jo Rada załožby za serbski lud wu-zwólowała nowego direktora teje załožby. A ten cesnoamtski pśedsedaŕ Załožboweje rady njejo mógał sobu wótgłosowaś, dokulaž jo se sam za tu wažnu funkciju pśizjawił. Za njogo su se skóńcnje teke rozsuźili: za 41lětnego Budyšynarja Jana Budarja.
Za Dolnu Łužycu jo te dobra powěsć. Dokulaž Budar a jogo familija znaju Dolnu Łužycu, maju how wjele serbskich pśijaśelow. Samo na premjerje nowego dolnoserbskego źiwadłowego kusa w Hochozy jo wón pobył. Wón se procujo teke dolnoserbski powědaś, gaž jo how.
To rozsuźenje njejo lažke było, jo pótom gronił Marko Šiman, pśedsedaŕ parlamentariskeje pśirady Załožby za serbski lud. Su měli tśoch dobrych kandidatow. Dla togo su trjebali za to pósejźenje teke ceły źeń, rownož planowany kóńc jo był južo zeger 12:00.