W Dolnej Łužycy mamy styri WITAJ-horty. To su horty, ako su zakładnym WITAJ-šulam pśirědowane a pódpěruju w swójej statkownosći WITAJ-projekt. To su hort „Njewjerica“ w Žylowje, „Hort móžnosćow“ we Wětošowje, Źiśecy a wuknjeński dom LIPA w Bórkowach a hort w Brjazynje.

Horty su wažna ressourca za wužywanje serbskeje rěcy zwenka wucby. W hortach ga su serbšćinarje a WITAJ-źiśi wótpołdnja pó šuli w lichem casu. Togodla se w hortach glěda na wužywanje serbskeje rěcy, na pśikład pśi domacnych nadawkach. Dalej pśewjeźo se w hortach aktiwne serbske kulturne žywjenje. W Žylowje swěśi se na pśikład kužde lěto ptaškowa swajźba ze źiwadłowym graśim w serbskej rěcy (lětosa njejo to móžno), w Bórkowach spiwaju źiśi w LIPA-chorje a maju mału rejowańsku kupku. Zgromadnje z Rěcnym centrumom WITAJ a Serbskim muzejom w Chóśebuzu su horty nowu iniciatiwu na nogi stajili: Cytańske wuběźowanje, ako jo se južo tśi raze pśewjadło.