W starem lěśe som se wó městno ako redaktor Nowego Casnika procował, a wjaselim se něnto w nowem lěśe pśipódla byś. Někotare wót was mě snaź južo znaju, ale pópšawem som hyšći njeznate woblico w serbskem swěśe. Pśi tom njejsom cysty zachopjeńkaŕ, dokulaž wót lěta 2017 som južo tam a zas něco w našom Casniku wózjawił.

Mě se groni Maks, ja som 25 lět stary a pśiźom ze Stryjkojc (Streich-witz), z małeje jsy gmejny Nowa Cala. To jo hyšći Dolna Łužyca, ale dawno zwenka sedleńskego ruma Serbow. Slědne Serby su tam, w regionje wulewa Nysy do Odry, pśed 200 lětami žywe byli. Ako som pó abiturje zachopił se zaběraś ze stawiznami regiona, som prědny raz wědobnje na toś te stawizny Serbow starcył.

2015 som togodla chopił studium sorabistiki w Lipsku. Bźez familiarnego kontakta k serbskej kulturje, som akle tam wuknuł dolnoserbšćinu. Mały swět, kenž som až do togo jano pótusnuł, jo se mě naraz wótwórił.