Som Stefanie Krawcojc, šefredaktorka „Nowego Casnika“ wót 1. januara. Nowa w redakciji pak njejsom! Prědny raz som how źěłała w lěśe 2014, źož som pór mjasecow wupomagała. „Pšawje“ zachopiła ako redaktorka som w lěśe 2015. Som ako tej drugej redaktora wobźěłała wšo, som wjele ducy była – a som zachopiła nowu rubriku za źiśi. Jej se groni „Pšašata rěpa“. Mjaztym som pśewzeła zagronitosć za cerk- winy bok „Pomogaj Bog“. To se mě spódoba, chójźim cesto namšu a som rada ducy w Serbach. Som wuknuła, kak wužytne to źěło w rubrikach jo. Toś cu něnt dalšne rubriki zawjasć a pšawidłownje pśinjasć nowosći a tšojenja na wšakich pólach. To budu na pśikład rolnikaŕstwo, šport, towaristwa a kubłanje.