Z Pódstupima/Potsdam. Kak pójźo dalej w bramborskich šulach w pśiducem tyźenju, hyšći njejo kradu jasne. Něco jo pak wěste: Za normalnym wucenim za kuždego wuknika a kuždu wuknicu w kuždem pśedmjaśe hyšći njewuglěda.

Jasne jo teke, až starjejše nadalej su we wuskosćach, ga deje paralelnje źěłaś, źiśi wobstaraś a teke wucyś. Rozmjej: Horty su zacynjone, ze źiśownjami wuglěda w kuždem wokrejsu a měsće pitśku hynac. Nuzne wobstaranje dajo za źiśi zakładnych šulow. Ale: Mjenjej starjejšych ako hyšći w nalěśu ma to pšawo, swóje źiśi tam pśiwjasć. Pšawo na take městno maju źiśi, ako by doma byli wobgrozone, gaž wóni njamógu howacej byś wobstarane abo gaž wobej starjejšej źěłatej w „kritiskej infrastrukturje“. K tomu słuša strowotniski system, farmaceutiski wobłuk, internaty, nuzne wobstaranje, policija, wognjowa wobora a wójsko, rolnikaŕstwo, lody, šule a teke žurnalisty. Pšawo na nuzne wobstaranje maju źiśi teke, gaž maś abo nan źěła w medicinskem abo woplěwańskem wobłuku. Młoźinske amty pśepytuju, lěc take pšawo w konkretnem paźe płaśi.